الرئيسية / الحياه الاجتماعيه / خطورة قناة طيور الجنة على الاطفال

خطورة قناة طيور الجنة على الاطفال

خطورة قناة طيور الجنة على الاطفال المقالة دي عن اضرار قناه طيور الجنه قنوات الاطفال المختلفه للناس اللي بتسال هل قناه طيور الجنه مضره على الاطفال ام لا احكي لكم تجربه حقيقيه عن خطوره قناه طيور الجنه و قنوات الاطفال التي يجلس عليها الطفل دون ان نشعر ماذا يحدث داخله من اضرار صدقة عن ابني اللي اتأذى و اتبهدل بسبب التليفزيون و طيور الجنة و طيور بيبي.

____________________________

لو أنتي أم جديدة او قديمة او لسة هتبقي أم إن شاء الله المقالة دة مهم جدااااا ولازم تعملي شير للواتس والفيس عندك.

ياجماعة محدش يسميها طيور بيبي اسمها على رأي دكتور توحد “طيور الجحيم” الله يقفلها خالص من عنده القناه الهباب دي اللي كل أم بتلجأ لها علشان متسمعش صوت زن ابنها وتلحق تخلص شغل البيت القناه اللي كلنا جاهلين بتأثيرها على أطفالنا.

بداية نطق ماما للاطفال

أقسم بالله إن ابني نطق مما اللي هي ماما قبل مايتم تلات شهور وكان بينطق حروف قال ببا اللي هي بابا بعدها.

كان طفل معجزة ف سن صغير جداا وبعد ما قعدت اعمل زي اي ام مش فاهمة وقعدته قدام طيور هباب وكنت بروح شغلي ومش فاضياله بسيبه مع جدته بردو تفتحله طيور زفت واجي من الشغل تعبانة مش قادرة اديله من وقتي وعاوزة اخلص شغل البيت افتحله القناة دي علشان يسكت.

خطورة قناة طيور الجنة على الاطفال

لحد ما ارتبط بيها جدا ومبقاش يسكت غير عليها وبعدها الموضوع اتطور ننادي عليه ميردش نتكلم ونتعامل ميبصش علينا مبقاش في تواصل بصري خالص حتى وانا بكلمه عينه مش معايا طبعا شكيت إنه مش بيسمع

بس لما كان بيسمع صوت طيور بيبي وهو في اوضة تانية كان يجي جري فعرفنا انه بيسمع طبعا وبدأنا نقارنه بأطفال تانية لقيناه متأخر وبقى على طول يزن وجاله سمات توحد لان كل حياته كانت طيور بيبي.

الطفل يحتاج دكتور تعديل سلوك وتنمية مهارات

المهم بدأنا نتدخل وبأمر الدكتور طفينا التليفزيون خالص وطبعا كان صعب عليه وبدأنا نستبدله بألعاب ونتكلم معاه كتير حاليا لسة متأخر عنده سنتين واربع شهور ولسة ماتكلمش ومحتاج تعديل سلوك وتنمية مهارات وانا بعاني.

حضرت محاضرة لدكتور مخ وأعصاب وعرفت ان التليفزيون في السن دة بيأثر ع الموصلات العصبية ف مخ الطفل وبيدمر خلايا ف المخ وبيأثر ع المساحات المسؤلة عن الذكاء والنطق والمعرفة بشكل عام و بيعمل ضمور في بعض المناطق.

بقول اللي فهمته بحاول اوصل المعلومة بطريقتي طبعا مكنتش أعرف حاجة زي كدة لاننا نجهل دة.

نصيحتي علشان ماطولش عليكم التليفزيون بيجيب توحد بنسبة كبيرة
خصوصا لو الطفل عنده استعداد وراثي للتوحد وف امريكا مانعين التليفزيون قبل سن سنتين علشان عارفين مدى تأثيره.

استبدلي التليفزيون والموبايل والتابلت بألعاب وانت غني للطفل بلهجة مصرية مش لهجة بلد تانية علشان ميحصلوش تناقض ويتلغبط وبيأثر ع اللغة عنده وادي لطفلك وقته ويغور شغل البيت.

ابنك اهم هاتيله العاب تفاعليه اشتركي في صفحات و جروبات التربية الخاصة والتوحد ومتقلقيش دي مش بتبقى توحد بس.

بالعكس بيكون فيها كمان تنمية مهارات حتى للطفل الطبيعي وتعديل سلوك يعني لو ابنك طبيعي نمي ذكائه بينزلوا العاب وانشطة تفاعلية.

استحملي ابنك وهو صغير علشان لما يكبر مش هتقدري تجري بيه وتلفي على مراكز وتدي جلسات تخاطب وتنمية مهارات وتعديل سلوك.

ياريت اللي تقرأ البوست تعرف غيرها وربنا يجازيها خير عشان بنرجع ندفع فلوس كتير في مراكز وجلسات تخاطب علشان من الأول مكناش عارفين ومحدش دلنا على الطريق الصحيح.

والله نفسي اعمل حملة لتوعية الأمهات واقول فيها مقاطعة طيور بيبي وطيور الجنة والتليفزيون بشكل عام
بستأذن حضراتكم تشيروا البوست على أوسع نطاق لعله يكون سبب في منع أطفال من الاصابة بإضطراب التوحد
،، البوست منقول عن أم بغرض التوعية لكل أم و أب#شير و #منشن لكل أم و أب و أنقذوا كل أطفالنا

عن Mohamed Hassan

مهندس يحب أن ينشر ما هو مفيد بعيداً عن اي مشاكل، بل العكس احب أن أضع لكم ما يجعل الحياة أفضل من خلال كلمات تصل للقلوب والعقول بفائدة حقيقة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *