الرئيسية / الحياه الاجتماعيه / رحت أتقدم لواحدة وقعدنا وحصل اللي حصل

رحت أتقدم لواحدة وقعدنا وحصل اللي حصل

واحدة مقربة مني رشحتلي زميلتها في الشغل للجواز ، وبعد كثير من المناقشات معاها صاحبتها قالت يجي يقابلني في محل حلويات اسمه قويدر ..

ما أعرفش ايه الفكرة يعني أنا متعود إني أروح كافيهات ، نوادي .. حاجات من هذا القبيل .. بس قلت تجديد وماله .. رحت على الجي بي اس المكان ودخلت ..

 

نسيت بس أعرفك شويا حاجات .. البنت 24 سنة ، أداب اجتماع ، ، من أسرة ميسورة الحال ، تمتلك شقتها الخاصة وعربيتها وبتشتغل في مجال الموضة والأزياء .. حلو كده 😃

أخطاء أول زيارة للعريس

المهم دخلت المكان لقيته قد كف الأيد مافيهوش مكان يتقعد فيه .. قالتلي تعالى نطلب أيس كريم .. وأخوك راسم دور الشاب المؤدب وقلت حاضر ولقيت كذا نوع ..قالتلي تطلب ايه .. قلتلها أي حاجة .. ودى كانت أول غلطة في الحوار وأنا زي الأهبل ماكنتش مركز ..

 

قالتلي هو انت متعود تخلي الناس تطلبلك .. !!

قلتلها خلاص فانيلا وشيكولاته .. بصتلي وقالتلي تقليدي أوي .. جرب فسدق ونوتيلا على ذوقي … قلتلها ماشي

 

قعدنا على كرسين وبدأت مرحلة استجواب فظيعة .. ليه ما اتجوزتش ، وطريقة لبسك لازم تتغير ، انت عارف انك بدأت تصلع وشعرك هيقع قريب ..

وبعدين قالتلي ايه رأيك في الأيس كريم .. قلتلها حلو .. قالتلي أحلى هو ولا االفانيلا والشيكولاته.. قلتلها كلهم كويسين .. بصتلي بصة مخيفة كده وقالتلي كويس انك عرفتني .. قلتلها عرفتك ايه .. سكتت ما ردتش

 

قالتلي هو موبايلك نوعه ايه .. قلتلها اتش تي سي .. قالتلي اشمعنى ده اللي اشترتيه .. قلتلها عادي اي اندرويد وخلاص .. والحوار خلص وروحت 😉

لقيت البنت اللي عرفتنا على بعض بتكلمني وبتقولي البنت مش مرتاحة وبتقول ماعندكش رأي .. لا عرفت تختار الأيس كريم ولا حتى نوع موبايلك .. قلتلها ايس كريم ايه..!!

ده انا بهاودها .. وموبايلي جبته عشان كان وقتها افضل موبايل في سنته ..

 

اتضايقت جدا من حكمها ده .. وروحت البيت اتخانق معاهم .. ازاي يعملوا صنية بطاطس من غير ما يطلبوا رأيي .. لقيت الحاجة واخويا بيضحكوا ويقولوا رأي ايه يابني .. من امته كان ليك رأي ما تطفح وانت ساكت .. انت مالك كده فيك إيه ..!! قلتلها انا ليا رأيي ولازم تسمعيه ، قالتلي يعني دلوقتي مش هتطفح الصنية دي .. قلتلها لا هاكل بس ليا رأي ولازم تسمعوه ..

 

كل واحد يقووول رأيه…..

 

عحبتني من السلطان

انا ليا رأي ومش مهم يتسمع😂

 

عن Mohamed Hassan

مهندس يحب أن ينشر ما هو مفيد بعيداً عن اي مشاكل، بل العكس احب أن أضع لكم ما يجعل الحياة أفضل من خلال كلمات تصل للقلوب والعقول بفائدة حقيقة.

اترك تعليقاً

لن يتم نشر عنوان بريدك الإلكتروني.